عاهات فيسبوكية

في هذا المنشور جمعت بعض النماذج الفيسبوكية اللي عندك ماتكون صادفتي شي حد منهم، واللي اذا تلقيتي بيهم هرب وماتعاودش تدور موراك 😀

1- سارق المنشورات: هاد النوع كاتلقاه فين ماجبر شي مقال زوين يشفرو وينزلو عندو بدون ذكر المصدر، المجهود اللي يقدر يدير هو انه يقلب من المؤنث للمذكر او العكس ، هاذ النوع كيكون وجهو قاصح بزاف حيث انه ملي كيعلقو عليه الناس تبارك الله عليك لقد أبدعت كيجاوبهم: شكرا لكم منكم أستوحي الهامي 😝

2- الفيمينيست العوجين: هاد النوع كاتلقاها كاتنشر حياتها الخاصة من طقطق للسلام عليكم (او بالاحرى الجانب الوردي المثالي من حياتها الخاصة) و اذا شي حد او شي وحدة سولاتها شي سؤال عااادي فديك حياتها الخاصة (اللي مابقاتش خاصة ملي تبارطاجات فالفيسبوك)، كاتلقاها مقروصة بوحدها و كاتجاوب: “ونتا سوقك؟ وعلاش تسول؟ بنادم يدخل سوق راسو بلابلا، الحرية الشخصية بلابلا المرأة حرة تدير اللي بغات بلابلابلا، الرجل شرير بلابلابلا ..”

3- خسارين الهضرة: هاد النوع اي ستاتو يكتبو مهما كان موضوعو ، ضروووري مايدخل شي عبارة ولا جوج فيها تخسار الهضرة، يقدر يكون كيناقش فكرة واعرة بزاف وكيطرح موضوع واعر، لكن ماغيحسش براسو انساان اذا ماخسرش الهضرة، كأنه داخل فالهوية ديالوم، زعما راحنا مخسرين وواعرين و شبيرة دالحومة (شحال ماسمعتو هاد شبيرة ياك)

4- سيد أعرف-كل-شيء: (Mr.know-it-all زعما )
هذا كاتلقاه فينما كان شي موضوع فالساحة، كيبدا يحلل و يقيم.. فالسياسة فالدين فالكورة فالمسلسلات فالفن، كيعتبر راسو عمييييق وكيتخيل راسو جالس فشي كرسي لفوووق وكيشوف من بعيد، وكيقول مساكن هاد الناس بسييطين مافاهمين والو اري ننورلوم البصيرة ديالهوم وكيخرج بشي ستاتو من قبيل “خسارة المنتخب المغربي هي مجرد مؤامرة لالهائنا على قضية سعد المجرد” (كيقولها دبصح ماشي طنز)
😀

5- الهة الفيسبوك المنزهين عن الخطأ: هذو كيكونو حاسبين راسهم نجوم، وباغيين نراسهم ديك الصورة دأنهم مشهورين والناس كيحماقو عليهم، هاذو كاتلقاهم اذا نزلو شي منشور كيستناو غير اللي يقولوم برافو نتا واعر، دمت سيدتي قدوة للمرأة المغربية، ياليت كل الشباب مثلك، و اذا شي حد سولت له نفسه انه يقول فكرة مخالفة او ينتقد كيخسرو عليه حاجة وحدة سيبريمي الكومنتر وبلوكي مولاه، باش ييقاو غير الناس الذين يسبحون بجلال شخصه وعظيم سلطانه

5- وكالة رويترز الدولية: هذا النوع اللي كاتبدا تتساءل شني كيعمل فحياتو حيت اذا كان كيقرا راه محااال ينجح، واذا كان خدام وريوني تانا هاد الخدمة نخدمها اللي كتخليلك هاد وقت الفراغ كامل ، هاد الانسان كاتلقاه ناقل اي خبار فالعالم ومنزلو فالفيسبوك خصوصا ديك الاخبار اللي ماغتفيدك فوالو “حادثة سير في كوبنهاجن”، “رجل يغتصب ابنته في الهند”.. كينزل عشرالاف بوست فالنهار حتى فيسبوك كاتلقاهم جمعوملك بالكورجة فالباج داكوي من قوة بزاف، على شوية فيسبوك يبدا يسولنا: est ce que vous considérez ces messages comme Spam?

6- عايشة الكوالة: هاد النوع كيستخدمو المنشورات ديالهم باش يردو على شي حد او يمعنيو على شي حد، مثلا كاتلقاهم كيردو على شي منشور اللي ماتحلاوش بالشجاعة انهم يعبروا على الرأي ديالهم فيه، وكيفضلو يمشيو للصفحة ديالهم ويهدرو على المنشور المعني بالأمر، ماشي بالحجة والدليل، لا، بالتكواال وحشي المعاني، باش يجمعو عليهم النكافات اللي عندهم فالصفحة (عذرا ابيدار على الاستعارة، شتي كونوا فحالي كانذكر المصدر 😛 اوك باي) قلنا النكافات فالصفحة اللي كيكونو وفيين ليها واللي قالت كيطبعولا ويقولولا عطاك الله الصحة الزين، عطييييتيها، و كتختم المنشورات ديالها ب msj envoyé
بشااااخ 😎
وهاد النوع بالمناسبة كاينين حتى بصيغة المذكر وبكثرة..

7- الاشباح: هذو متبعين عليك كل صغيرة وكبيرة فالفيسبوك، غالبا ماكيكونو من العائلة او صحاب العائلة او الناس اللي ماكيفهموش بزاف فالفيس، كيكونو كيخافو يبغيو يديرو جيم ويزدقو مصيفطين تصويرة ديالهم دالسيلفي وهوما عاد فايقيين من النعاس، اللهم كيعملو من الناقص.. هاد النوع كاتنسى انهم عندك فالفيس او كيكونو عندك بشي اسم مستعار اللي نتا براسك ماعارفوش شكون، حتى كاتتلقاهم ويقولوك ااه زوييينة ديك اللعيبة اللي كتبتي نهار 12 فشهر نونبر وعجبنييي التعليق الخامس ديال صاحبتك اللي قاتلك بلا بلا … اند يو ار لايك 😱😱😱😱وااااات تخلعت انا تزعزعت.. كاتحس براسك مرااقب من طرف شيحاجة كثار من المخابرات ..

8- المسمومين: هذو كاتكون علاين تعتبرهم اشباح حتى كيبانولك مخبعين مع الدورة فالجيمات دالتعاليق اللي كاتكون ضدك، هاذ الناس كيكونو غالبا كيكرهوك لوحد الدرجة مايقدروش يمسحوك حيت خصهوم تبقا على عينوم باش اذا جات الفرصة يتشفاو فيك مايضيعوهاش،
طبعا هذو عمرهم ما يعملو جيم عمرهم مايكومونتيو، ولكن وقتما كان شي تعليق مخالف لك كاتكليكي على شكون عمل جيم كاتلقاااه حاااااضر بقوة دائما وأبدا وفي للمبدأ: #ضد كل الضد..

هاد الناس من الاحسن تتفاداهم فالفيسبوك باش يبقى زوين ونظيف، حيت النظافة من الايمااان ناااعام.. 😀
هادشي كووولو قلناهلك باش تستهلك بلااا ما تهلك

عبر أنت أيضا ..

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: